Selelekela

Ho ntse ho tsoela-pele ho etsahala tse ngata ka hare ho khoebo ea boea ba Lesotho, ‘me tse ipetsang pele ke hore e ka ka ‘Muso ka Lekala la Likhoebo tse nyenyane, Likoporasi le Limmaraka o tla fana ka tumello ho likhoebo tse ling hape tse hlano ho tla rekisa boea ka hare ho naha. Leha ho le joalo, tlasa maemo a fe kapa a fe, Mokhatlo oa bahlahisi ba Farelane le Seiboko le bo-mphato oa bona Wool and Mohair Promotion Project (WAMPP) li ntse li tsitlalletse ho thusa lihoai ho hlahisa likhutšoane tsa boea ba boleng bo holimo, bona bo hlokoang ke bareki.

Setsi sa tsoaliso ea liramo le lipheleu se ile sa buloa ka molao Mokhotlong ‘me setsi sena se tla sebetsa ho hlahisa liphoofolo tse ntlafalitsoeng e le ho fokotsa sekhahla sa lihoai tse eang ho la Afrika Boroa ho reka liramo le lipheleu. Hona ho bolela hore litjeo tsa ho reka mehlape li tla fokotseha  ka ha joale chelete ea ho tlosa liphoofolo kantle ho naha e ne e le boima haholo ho latela ka Molula-Setulo oa Mokhatlo. Bongata ba bahlahisi ba Farelane le Seiboko ba ile ba bontša ha bongata ba Basotho bo se bo ntlafalitse mehlape haholo papisong le lilemo tse ‘maloa tse fetileng hoo ba seng b aka qothisana lehloka lipontšong tsa Afrika Boroa, ‘me sena se thabisa haholo.

Ka Leribe la ‘Mamosa le Molapo, leqhekoana la Ha Ramoloi Nkhono ‘Mampati Matla le ntse le tsoela pele ho ipabola ka ho hlahisa meroho ka mefuta-futa motseng ona oo oa Ha Ramoloi. Nkhono ‘Mampati o ile a qalella tlhahiso e matla ka mora hore a fumane thuso ea litsiane ho tsoa ho Smallholder Agricultural Development Project e tsebahalang ka lebitso la SADP. Litsiane tsena li ile tsa mo thusa ho fumana letanta leo ho hlahisetsoang meroho ka hare ho lona, ka teng moo a ka hlahisang meroho le mariha.

Se thahasellisang ka Nkhono ‘Mampati ke hore o hlahisa meroho eo ka moiteli oa liphoofolo feela a sa sebelise manyolo a iketselitsoeng le tsona lichefu ho tebela likokonyana. Nkhono ‘Mampati ke e mong oa lihoai tse hloahiloeng hore meroho ea hae e tla sebelisoa tlholisanong ea liphehi tsa boemo bo holimo e tla ba Lipontšong tsa Sesiu tse bang selemo le selemo khoeling ea Loetse.

 

 

 

 

Leave a Reply

Your email address will not be published. Required fields are marked *