MOKAKA

Oa mokola ose a qhitsa eka lenamats’oana le robile liri. O khokhoba joalo kobo eseka makoakoa a tlhako’a khomo ea ngoahola kola.

Be! Ke eo a se a hlaba ka mangole joaloka balisana naheng haba utloa “boriba!”.

Mokaka ke lefu le kotsi leo esale le ts’ajoa ke lihoai kaha le theola moruo ka ha khuts’oane kapa khomo e khokhosela ka lebaka ka maqeba a ka likholaneng. Phoofolo e theola boima le kholo, tlhaiso ea boea e ea thefuleha le menyetla ea ho bapatsa phoofolo ea mokaka ‘marakeng e ea fokola.

Sesosa?

Pula mahlopha a senya! Le hoja re e thabetse tjee, e tlilo ritela setoto sa ntlo e kholo se tlang ho ba lehae la kokoana-hloko ea Nodusus (D. or B. or F. Nodusus). Mokaka ke lefu le ts’oaetsanang ho tloha kholoaneng e ‘ngoe ho isa ho e ‘ngoe, ekaba ho tloha ho likhomo ho isa ho khuts’oane. Likoloi tse hatileng moraheng o nang le kokoana-hloko ea mofuta ona le tsona li fetisa kokoana-hloko ea mokaka.

Lefu la moraha le amana haholo le tikoloho kaha kokoana-hloko ea teng e phela moo holeng mongobo ekaba seretse kapa lekhulong. Hona ho bolela hore ts’oaetsano ekaba teng nakong ea lehlabula ha pula ena ebile ho futhumetse.

Mats’oao

Liphoofolo tse nang le mokaka liba le boritsa ‘me mats’oao ana a eba ka tatellano joaloka ha a boletsoe:

  • Boruruisi bo bofubelu, le mongobo ka likholaneng
  • Le khekhebu le lesoeu le mongobo ka likholoaneng.
  • Ho arohana hoa litho tsa likholana.

Ke liphoofolo li fe tse kotsing?

Likhuts’oane tsohle li ka eba le mokaka. Mats’oao ha abe mabe haholo ho seiboko empa farelane ke eona e kotsing haholo kaha mats’oao a eba mabe haholo.

Likhomo le likolobe le tsona lika eba le mokaka.

Pheko

  1. Ho kuta likholane

Hang ‘ngoe kapa habeli ka selemo, likholane li lokela ho kutoa ‘moho le ts’ebeliso ea metsoako kaha ho kuta feela ntle ho ts’ireletso ho beha phoofolo tsietsing le ho feta. Likholane tse sa kutoang lika peperana tsa boloka likokoana-hloko ‘me moea o hloekileng ha o fokele ebe ho eba le lefu la mokaka. Lisebelisoa tsa ho kuta likholana li lokela ho hloekisoa ele hore likokoana-hloko li se ke tsa fetisoa ho tloha ho phoofolo e ‘ngoe ho isa ho e ‘ngoe. Haeba ho ena le lipotso mabapi le hore na ho kutoe hakae, ho molemo ho botsa ngaka ea liphoofolo kapa mosupisi ea haufi.

mokaka-2

  1. Motsoako oa:

Phoofolo ka ‘ngoe e lokela ho nka metsotso e mehlano ho isa ho e leshome e inetse maoto ka motsoakong.

  1. Zinc Sulphate 10% ka tekanyo ea 1kg ho 9 litres ea metsi. Papisong le metsoako e meng, Zinc Sulphate ha e kotsi ‘me ha e lome likhuts’oane.
  2. Formalin 5% – tekanyo ea 1:19
  3. Radicate – tekanyo ea 10 litres ho 100 ea metsi. E sireletsa phoofolo libeke tse peli. Ha e sebelisoa ho phekola, phoofolo e lokela ho nka nako e telelenyana maoto a le ka motsoakong.
  4. Meriana e phoofo

Zinc sulphate ea phoofo e ka ts’eloa ka lebokoseng monyako ebe liphoofolo li tla hata pele li kena ka lesakeng. Lime le meriana e emeng lika ts’oaloa fats’e ele ho fokotsa mongobo.

  1. Ho noesa

Zinc Sulphate e ka sebelisoa ka tekanyo tse elelitsoeng ke ngaka kapa mohlahisi ebe ho noesoa liphoofolo.

  1. Ho Enta

Meriana e tsosang sesole sa ‘mele joaloka; penicillin, streptomycin, oxytetracycline

  1. Meriana e ts’eloang holim’a likholana
  2. Zinc Sulphate 10%
  3. Copper Sulphate 10% le vinegar
  4. Oxytetracycline le joala ba sekhooa
  5. Penicillin le joala ba sekhooa
  6. Iodine solution
  7. Ho thibela

Pele nako tsa selemo tsa pula liqala, sehoai se lokela ho thibela mokaka ka ho enta tlas’a letlalo. Ente e thibelang e ka phetoa ho nyolla ts’ireletso.

Taolo le ho phephethela mokaka

Ho phephethela mokaka, liphoofolo tse kulang li lokela ho bolaoa ebe tikoloho e ea hloekisoa; tse setseng ebe lia phekoloa. Mekhoa ea ho phephethela mokaka:

Taolo:

  • U se ke oa reka phoofolo e nang le mokaka kapa e tsoang mohlapeng o nang le mokaka leha phoofolo e sa bonts’e mats’oao.
  • Qoba ho reka liphoofolo tse neng li bolokuoe mechining kapa likoloing tse neng li ts’etse liphoofolo tse kulang.
  • Kuta likholana, phekola ‘me o a role liphoofolo tse fihlang bonyane libeke tse peli pele o likopanya le tsa khale.

Ho phephethela:

  • Ho bolaea hang hoa liphoofolo tse bonts’ang mats’oao a bokulo
  • Ho laola, ebe ho oa kutoa/ho fusisetsa ebe liphoofolo lia bolaoa.
  • Ho arola liphoofolo tse kulang ho tse sa kuleng.

 

mokaka-3

 

 

 

 

 

 

Leave a Reply

Your email address will not be published. Required fields are marked *