Lipontšo tsa Farelane le Seiboko Mokhotlong

lipontso tsa ferelane

 

 

 

 

 

Tse ling tsa liramo tse hapileng tlholisano.

Ka; ‘Makarabo Matšumunyane

Lipontšo tsa Farelane le Seiboko tse neng li tšoaretsoe seterekeng sa Mokhotlong li ile tsa tsamaea ka thello ho sa tsotellehe maemo a renang ka hare ho naha ea Lesotho le liqholotso tse tobileng lihoai selemong se fetileng sa 2018 moo teng li ileng tsa sitoa ho isa boea ba bona limmarakeng tse bulehileng tsa lefatše. Lihoai tsa likhutšoane tsa Mokhotlong li ile tsa bontša ha li ne li le monyebe ho kenela lipontšo kaha joale ho le boima ntlheng ea lichelete hobane ha ba e so ka ba fumana kuno ea bona ea mokuto oa 2018 e felletse. Ba bontšitse ha ba hloka litsiane tsa ho rekela liphoofolo lijo bakeng sa phepo – tlatsetso e leng se amang boleng ba boea ba bona. Leha ho le joalo, lihoai tse 450 li ile tsa atleha ho ngolisetsa lipontšo ka linku tse 746 le lipoli tse 304. Kantle ho liqholotso tseo lihoai ka bonngoe li ne li kopane le tsona, Mokhatlo oa naha oa Farelane le Seiboko e ona k abo oona o fetile har’a lintho tse ngata tse sisimosang pelo empa o ile oa ‘na oa atleha  ho ntšetsa pele moralo ona o teng molao – thehong oa oona joalokaha molula – setulo oa Mokhatlo Monghali Thinyane a ile a bolela.

Lipontšong tsena ho ne ho le teng litho tsa komiti ea setereke sa Mokhotlong, litho tsa komiti ea naha ea Mokhatlo oa Farelane le Seiboko le litho tsa likomiti ho hlaha literekeng tse ling, Wool and Mohair Poromotion Project (WAMPP), basebeletsi ba lekala la temo seterekeng sa Mokhotlong hammoho le basupisi le bafani e leng libanka. Molula – setulo oa Mokhotlong oa komiti ea Mokhatlo oa Farelane le Seiboko Monghali Thateng Nkhahle o ile a bontša hore khatelo – pele e bonahala e le ntle haholo kaha lihoai tsa Mokhotlong li ntse li tsoela – pele ho ntlafatsa ho feta lilemo tse fetileng. Ho ile hoa hlola linku tse 182, lipoli tse 21 ha lihoai ka kakaretso tseo liphoofolo tsa tsona li hlotseng li ne li le 60. Lihoai li bontšitse ha li thabela lipontšo tsena haholo kaha e le moo ba itekolang hore na ba ntse ba sebetsa joang ntlafatsong ea Farelane le Seiboko le hore na ba se ba le boemong bo fe ka ntlafatso.

Hona moketjaneng oo, ke hona teng moo ho ileng hoa tlotloa ‘mé ‘Matšepo Masumuthe e leng mosupisi oa mehleng oa setereke sa Mokhotlong ea seng a ea phomolong. Lihoai li ile tsa bolela hore ba sebelitse le eena ka khotso ka nako e telele ea lilemo tse 33 ‘me o ba sebelelitse ka boitelo le ka sebete. ‘Mé ‘Matšepo o ile a bontša ha a sebelitse hantle le lihoai ho na le ho ba boima ka linako tse ling empa ba hahamalla pele ba ba ba fihla moo ba leng teng kajeno. Hona e ne le qaleho ea lipontšo tse tla potoloha le naha setereke ka setereke ‘me katleho e bonoeng Mokhotlong e se e ka e ka anela le literekeng tse ling kaofela ho fihlela re fihla lipontšong tsa naha ka bophara moo hot la beng ho qothisanoa lehlokoa ke litereke. Re re ho lona le se ke la nyahama lihoai tsa khabane tse sebetsang ka thata, hahamallang ho ea pele le ho ikhaha ho sa tsotellehe liqholotso tse le tobileng le maemo a renang.

MOSUPISI OA MEHLEN

 

 

 

 

 

 

Mosupisi oa mehleng oa setereke sa

Mokhotlong Mats’epo Masumuthe.

 

Leave a Reply

Your email address will not be published. Required fields are marked *